សៀមរាប៖ នារីម្នាក់បានលោតទម្លាក់ពីលើចំរាក់ភ្នំក្រោមដើម្បីធ្វើអត្តឃាត មិនបណ្តាលឲ្យស្លាប់ ប៉ុន្តែរងរបួសធ្ងន់កាលពីថ្ងៃទី០៥ ខែមេសា ឆ្នាំ ២០២០ វេលាម៉ោង១៨និង៥០នាទី។

លោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាបបានអោយដឹងថាមាននារីម្នាក់មានវិបត្តិផ្លូវចិត្ត ហើយបានលោតពីលើចំរាក់ភ្នំក្រោម ដើម្បីធ្វើអត្តឃាតកម្ពស់ប្រហែល២៥ម៉ែត្រ ត្រង់ចំណុចខាងជើងកាំជណ្ដើរឡើងទៅកំពូលភ្នំ កាលពីល្ងាចថ្ងៃទី០៥ ខែមេសា ឆ្នាំ២០២០។

នារីរងគ្រោះមានឈ្មោះ រឿត រដ្ឋា អាយុ១៨ឆ្នាំ មានស្រុកកំណើតនៅ ភូមិបាឡាំង ឃុំវត្តគោ ក្រុង/ខេត្តបាត់ដំបង។
បច្ចុប្បន្នស្នាក់នៅបន្ទប់ជួល ភូមិធ្លោកអណ្ដូង សង្កាត់ស្លក្រាម ក្រុង/ខេត្តសៀមរាប។

ក្រោយកើតហេតុសមត្ថកិច្ចបានបញ្ជូននារីរងគ្រោះទៅសង្គ្រោះបន្ទាន់នៅគ្លីនិក ស៊ឹង រិទ្ធីរ៉េត និងបានប្រកាសរកក្រុមគ្រួសារនារីរងគ្រោះ។

លោកអធិការក្រុង ក៏បានបន្តទៀតថាកម្លាំងសមត្ថកិច្ចជំនាញបានពិនិត្យស្រាវជ្រាវជុំវិញកន្លែងកើតហេតុ ហើយរកមិនឃើញមានពាក់ព័ន្ធនឹងករណីព្រហ្មទណ្ឌទេ។

បច្ចុប្បន្ន ដោយសារជនរងគ្រោះមានរបួសធ្ងន់ធ្ងរ (ផុងលលាក្បាល ) ទើបក្រុមគ្រួសារជនរងគ្រោះសម្រេចចិត្តដឹកយកទៅព្យាបាលបន្តនៅមន្ទីរពេទ្យខេត្តបាត់ដំបង ៕